Fréttayfirlit

Aðildarfélög Handverkshátíðar hafa ákveðið að hátíðin hafi nú farið fram í síðasta sinn í núerandi mynd en erfitt reyndist að byggja henni aftur grundvöll að loknum heimsfarandri Covid.

Ákveðið hefur verið að ráðast í endurskipulagningu á Handverkshátíðinni en félögin sem að hátíðinni standa finna fyrir breyttu landslagi eftir heimsfaraldur Covid. Til þess að þróast í takt við óskir og hugmyndir sem fram hafa komið þarf að vanda til verka, óska eftir umsögnum og hugleiðingum sýnenda, fastagesta og annarra sem að sýningunni koma. Svo vel megi ganga er því gott að hafa góðan tíma til undirbúnings en faraldurinn hefur nú þegar gefið okkur tíma til að íhuga breytingar og tækifæri til að huga að því sem vel hefur verið gert og því sem betur má fara. Öll vinna í kringum hátíðina er sjálfboðavinna í fjáröflunarskyni fyrir þau fjölmörgu félög sem að henni standa og því er mikilvægt að vanda til verka og gefa sér nægan tíma. Hefur því verið ákveðið að Handverkshátíð muni ekki fara fram í sumar en strax í haust mun skipuleggjendum, sýnendum og örðum áhugasömum verða boðið á málþing um endurskipulagningu Handverkshátíðarinnar.

Stjórn og aðstandendur Handverkshátíðar hefur tekið ákvörðun um að hátíðin muni fara fram með óhefðbundnu sniði í ár vegna óvissu um áhrif heimsfaraldurs. Handverkshátíð og Matarstígur Helga magra hafa tekið höndum saman fyrir sumarið 2021 og munu vera með reglulega bændamarkaði þar sem lögð verður áhersla á mat og handverk úr Eyjafjarðarsveit.

Í ljósi aðstæðna í samfélaginu vegna Covid-19 faraldursins hefur stjórn Handverkshátíðarinnar í samvinnu við aðildarfélög ákveðið að fresta hátíðinni fram til ársins 2021. Ákvörðunin var tekin að vel ígrunduðu máli í samráði við helstu samstarfsaðila. Ákvörðunin var erfið en nauðsynleg í ljósi aðstæðna og útgefinna leiðbeininga um samkomur. Undirbúningur er hafinn að Handverkshátíð 2021.

Opnað hefur verið fyrir umsóknir á Handverkshátíð 2020. Nú þegar hafa borist fjölmarkar umsóknir svo það er ljóst að Hátíðin í haust verður spennandi og fjölbreytt. Árlega sækja 10-15 þúsund gestir Handverkshátíðina á Hrafnagili í Eyjafjarðarsveit. Handverkshátíðin 2020 er ein rótgrónasta hátíð landsins og verður hátíðin í ár sú 28. í óslitinni röð frá upphafi. Hátíðin hefur heldur verið að sækja í sig veðrið undanfarið og árið 2019 voru yfir 120 sýnendur og ljóst er að mikil gróska er í íslensku handverki og hönnun.

Opnað verður fyrir umsóknir um þáttöku á Handverkshátíð í Hrafnagili 2020 um miðjan mars.

Opnað hefur verið fyrir skráningar á Handveskrshátíðina í Hrafnagili, Eyjafjarðarsveit 2019. Þetta mun vera 27. hátíðin frá upphafi og hefur hún verið afar vinsæl hjá handverksfólki hingað til og stundum hafa færri komist að en vilja. Því er um að gera að sækja sem fyrst um þáttöku. Hátíðina sækja 10-15 þúsund manns árlega og er Handverkshátíðin því frábær vetvangur fyrir handverksfólk og hönnuði til að kynna sig og selja vörur sínar.

Stjórn Handverkshátíðar hefur gengið til samnings við fyrirtækið DUO. um framkvæmdastjórn Handverkshátíðar en að fyrirtækinu standa þær Kristín Anna Kristjánsdóttir og Heiðdís Halla Bjarnadóttir.

Handverkshátíðin leitar eftir áhugasömum aðila til að gegna stöðu framkvæmdarstjóra. Leitað er eftir aðila sem hefur mikinn áhuga á málefnum Handverkshátíðarinnar og hefur áhuga á að taka verkefnið að sér til lengri tíma.

Á opnunarhátíðinni á föstudagskvöldið 9. ágúst tilkynnti dómnefnd hátíðarinnar þrjá verðlaunahafa. Verðlaun voru veitt fyrir fallegasta bás ársin, nýliða ársins og handverksmann ársins.