Undirbúningur Handverkshátíðar og Landbúnaðarsýningar við Hrafnagilsskóla 2012 er kominn á
fullan skrið og gengur vel að sögn Esterar Stefánsdóttur framkvæmdastjóra sýninganna. „Kvenfélagskonurnar okkar eru að leggja
lokahönd á að prjóna utan um traktorinn á Kristnesi.“Eins og frægt er orðið hafa þrjú kvenfélög í Eyjafjarðarsveit
sameinast um að prjóna utan um gamla Deutz dráttarvél sem verður tenging milli sýninganna tveggja í ár. Samhliða hinni árlegu
Handverkshátíð við Hrafnagilsskóla mun Búnaðarsamband Eyjafjarðar fagna 80 ára afmæli sambandsins með veglegri
Landbúnaðarsýningu á svæðinu.
„Nú förum við svo öll að hefjast handa við að prjóna, sauma eða hekla utan um póstkassana“ segir Ester,
en hún hefur í Auglýsingablaði sveitarinnar hvatt íbúana til að skreyta póstkassa sína með handveki í tilefni sýninganna
tveggja. Frá og með laugardeginum 7. júlí hefur almenningur kost á að velja fallegasta póstkassann á sérstökum
atkvæðaseðlum en kjörkassar verða staðsettir hjá ferðaþjónustuaðilum sveitarinnar.