Auglýsingablaðið

Auglýsingablað 1238. tbl. 16. árg. þriðjudaginn 9. apríl 2024.

Íbúafundur um endurskoðun skólastefnu Eyjafjarðarsveitar í kvöld 9. apríl kl. 20:00, í Laugarborg
Skólastefna eða menntastefna, vilt þú hafa áhrif?
Vinna er hafin við endurskoðun skólastefnunnar sem er frá 2017. Verkefnið er fólgið í því að greina núverandi stöðu á gildandi skólastefnu og móta framtíðarsýn með skýrum viðmiðum um gæði menntastarfs.

Rík áhersla er lögð á samráð við stjórnendur, starfsfólk, nemendur, foreldra og aðra íbúa sveitarfélagsins við endurskoðun skólastefnunnar. Opið ferli og samtal við samfélagið er mikilvægt svo vel takist til við mótun stefnu og innleiðingu enda er slíkt grundvöllur þess að sem mest sátt ríki um stefnuna.

Dagskrá fundarins:
Kynning á stýrihóp og verkefninu.
Fyrirlestur - Gerð og mikilvægi menntastefnu sveitarfélaga.
Hópavinna.
Samantekt, spurningar og næstu skref.
Fundi lokið um kl. 22:00.

Athugið!
Eftir fundinn verður opið skjal/könnun í eina (1) viku sem verður hægt að skrifa í fyrir þá sem ekki komast á fundinn um sama efni og var rætt. Skjalið verður birt á heimasíðu sveitarfélagsins.

Einnig er hægt að senda tölvupóst eða hringja í verkefnastjóra Gunnþór Eyfjörð Gunnþórsson á netfangið gunnthor@ais.is eða í síma 699-1303 og koma á framfæri ábendingum.

Með von um gott samstarf og góða þátttöku
Stýrihópur um endurskoðun skólastefnu.

Aðalsafnaðarfundur Grundarsóknar – miðvikudaginn 10. apríl kl. 20:00
Aðalfundurinn verður haldinn í Sólgarði (Smámunasafn Sverris Hermannssonar).
Venjulega aðalfundarstörf.
Öll velkomin.
Sóknarnefndin.

Aðalsafnaðarfundur Kaupangssóknar verður haldinn í Kaupangskirkju þriðjudaginn 16. apríl nk. kl. 16:00 (ATH. FUNDARTÍMA).
Dagskrá fundar: Venjulega aðalfundarstörf. Allir velkomnir.
Sóknarnefndin.

Vortónleikar Karlakórs Eyjafjarðar verða haldnir föstudaginn 19. apríl í Laugarborg kl. 20:00 og laugardaginn 20. apríl í Bergi á Dalvík kl. 16:00. Flutt verða lög við texta Kristjáns frá Djúpalæk í bland við annað efni.
Kórstjóri: Guðlaugur Viktorsson.
Aðgangur 4.000 kr.

Deleríum Búbónis!
Kirkjukór Grundarsóknar heldur tónleika í Laugarborg klukkan 20:00 að kvöldi síðasta vetrardags þ.e. 24. apríl. Kórinn hefur síðustu misserin verið að æfa lög Jóns Múla og Jónasar Árnasona í útsetningu Þorvaldar Arnar Davíðssonar kórstjóra. Við förum yfir lögin úr Deleríum Búbónis ásamt fleiri perlum úr smiðju þeirra bræðra.
Teflt er fram kór og hljómsveit og verður enginn svikinn af þessari kvöldstund.