Sveitarstjórnarfundur
498. fundur sveitarstjórnar Eyjafjarðarsveitar verður haldinn í fundarherbergi sveitarstjórnar, Skólatröð 9, miðvikudaginn 14. júní og hefst hann kl. 15:00.
Dagskrá fundarins verður kynnt á upplýsingatöflu í anddyri skrifstofunnar og á heimasíðu sveitarfélagsins.
Frá fjallskilanefnd
Sleppingar
Samkvæmt 7. gr. samþykktar um búfjárhald nr. 581/2013 hefst beitartímabil á sameiginlegt beitarland 10. júní ár hvert en lýkur um göngur á haustin vegna beitar sauðfjár, hefst 20. júní ár hvert en lýkur 1. október sama ár vegna beitar nautgripa, og hefst 20. júní ár hvert og lýkur 10. janúar á næsta ári vegna beitar hrossa. Ekki er tilefni til að víkja frá þessum ákvæðum.
Áhersla er lögð á að fjallsgirðingar skulu fjár- og gripheldar fyrir 10. júní og séu það til 10. janúar ár hvert sbr. 5.gr. samþykktar 581/2013.
Mælst er til þess að fullorðnum hrútum sé ekki sleppt á afrétt.
Gangnadagar
Ákveðið að 1. göngur verði laugardag og sunnudag 2.-3. september og 9.-10. september. 2. göngur verði 16.-17. september og 23.-24. september. Hrossasmölun verður föstudaginn 6. október. Stóðréttir verði 7. október, sbr. bókun á 30. fundi nefndarinnar 2. desember 2016. Ef efni eru til eftirleitar skal miðað við að þær verði farnar eigi síðar en 20. október.
Framhaldsskólaakstur næsta skólaár
Núverandi og tilvonandi nemendur MA og VMA sem hyggjast nýta sér akstur á vegum sveitarfélagsins næsta skólaár, ef í boði verður, eru beðnir um að hafa samband á skrifstofu sveitarfélagsins á netfangið esveit@esveit.is eða í síma
463-0600 fyrir 12. júní. Rætt verður um framhald þjónustunnar í ljósi upplýsinga sem þá liggja fyrir. Því er mikilvægt er að fá sem gleggstar upplýsingar.
Starfsfólk skrifstofu
Ferðamálafélag Eyjafjarðarsveitar
Hér með er boðað til aðalfundar Ferðamálafélags Eyjafjarðarsveitar, þriðjudaginn 13. júní kl. 20:00 að Silvu. Á dagskrá verða venjuleg aðalfundarstörf skv. lögum félagsins sem finna má á neðangreindri slóð. Einnig verður boðið upp á fræðsluerindi. Súpa og brauð í boði félagsins.
Mikilvægt að sem flestir mæti til að ræða ferðaþjónustuna og félagsstarfið.
http://www.esveit.is/is/ferdathjonusta/ferdamalafelag-eyjafjardarsveitar/log
Bókhaldsþjónusta
Færsla alhliða bókhalds, afstemning/uppgjör, gerð ársreikninga, vsk skattskil, skattskýrslugerð, launavinnsla ofl. Einnig er veitt aðstoð þeim, sem vilja sjálfir sjá um bókhaldið sitt. Tímabundin ráðning, hjálp á álagstímum. Innheimta viðskiptakrafna: Skráning/útsending greiðsluseðla, breytingar/niðurfelling á kröfum, útsendar innheimtuviðvaranir, áframsending til Innheimtuþjónustu Motus og þjónustuaðili sér um öll samskipti.
Boðið upp á að þjónustuaðili komi á vinnustað viðskiptavinarins og vinni með bókhald þar.
Heiðubók, Botni, 601 Akureyri, sími 615-2589, heidubok@gmail.com
