Breytingar á Aðalskipulagi Eyjafjarðarsveitar 2005-2025 hafa verið staðfestarHelstu breytingar: Landnotkun á Syðra-Laugalandi, Syðri-Varðgjá og Álfaslóð er að hluta til breytt, afmörkun íbúðarsvæðis að Þórustöðum II er breytt og skilgreiningu á verslunar- og þjónustusvæði að Stokkahlöðum er breytt. Legu reiðvegar – Héraðsleiðar 2 er breytt og hámarkshraði í Hrafnagilshverfi verður 30 km. Reglum um lágmarksfjarlægðir milli íbúðarsvæða og útihúsa er breytt, sett er ákvæði um aðstöðuhús og settar vinnureglur um gerð deiliskipulags, breytingar á aðalskipulagi og framkvæmdaleyfi. Breytingin öðlast þegar gildi.
Skrifstofa Eyjafjarðarsveitar
Auglýsingablaðið
Síðasta auglýsingablað fyrir jól kemur út 18. desember. Síðasta blað ársins kemur út þriðjudaginn 30. desember. Auglýsingar þurfa að berast í síðasta lagi kl. 10:00 deginum áður á netfangið esveit@esveit.is.
Jólafundur kvenfélagsins Iðunnar
Fimmtudagskvöldið 11. desember kl. 20:00 í Laugarborg. Munið eftir jólapökkunum. Allar konur velkomnar. Eigum notalega stund saman við kertaljós og jólasögur.
Jólakveðjur frá stjórninni
Skötuhlaðborð á Þorláksmessu
Lionsklúbburinn Vitaðsgjafi býður til skötuveislu í mötuneytinu á Hrafnagilsskóla á Þorláksmessudag frá kl. 11:00 - 14:00. Saltfiskur verður til reiðu handa þeim sem ekki þora. Verð á mann er 3.000 kr. Komið, gleðjist og styrkið gott málefni.
Frekari upplýsingar og skráning hjá:
Aðalsteini Hallgrímssyni addiha@est.is s: 863-1207
Sigurði Steingrímssyni sigurdurs@nmi.is s: 894-9330
Tryggva Jóhannssyni gunnaogtryggvi@simnet.is s: 869-6158
Aðventukvöld í Grundarkirkju – „Syngjum jólin saman inn"
Aðventukvöld kirkjukórs Laugalandsprestakalls verður í Grundarkirkju sunnudagskvöldið 14. desember kl. 20:00. Fram koma kirkjukór Laugalandsprestakalls undir stjórn Daníels Þorsteinssonar, skólakór Hrafnagilsskóla undir stjórn Maríu Gunnarsdóttur og nemendur úr Tónlistarskóla Eyjafjarðar. Ræðumaður kvöldsins verður Hrund Hlöðversdóttir skólastjóri og prestur sr. Hannes Örn Blandon. Kirkjukórinn mun frumflytja nýtt jólalag, Jólasnjó, eftir Daníel við texta Jóhannesar úr Kötlum auk þess sem sungin verða gömul og ný lög tengd jólum og aðventu.
Sveinsbær á aðventunni
Jólagarðurinn er opinn til kl. 21:00 öll kvöld. Eplakofinn er opinn kl. 14:00 – 18:00 laugardag og sunnudag. Bakgarður „tante Grethe“ er opinn kl. 14:00 – 18:00 alla daga. Dagur heilagrar Lúsíu er 13. desember og við klæðumst hvítu. Glögg og góðgæti fram eftir degi. Opið til kl. 21:00 á Lúsíudaginn en einnig 20. 22. og 23. desember.
Hallgerður langbrók kemur á Kaffi kú
Það verður fjör á Kaffi kú laugardagskvöldið 13. desember kl. 20:30. Guðni Ágústsson verður gestur kvöldsins og segir okkur frá lífi Hallgerðar. Bókin hans segir frá afleiðingum eineltis og kynferðislegrar misnotkunar. Hallgerður Langbrók var og er misskilin kona, en hér er saga hennar sögð í nýju ljósi. Guðni selur og áritar bókina.
Allir velkomnir bæði konur og karlar
Fyrstur kemur, fyrstur fær
Aðeins eru eftir 3 renndar hettupeystur með merki Hrafnagilsskóla. Rauð str. 128, grá str. L og grá str. 128 (ómerkt). Þeir sem eiga eftir að greiða fyrir peysurnar sínar eru hvattir til að gera það sem fyrst.
Að lokum viljum við þakka þeim sem keyptu af okkur peysur og öllum sem hafa styrkt okkur á árinu í fjáröflun okkar.
Bestu kveðjur og gleðileg jól.
Nemendur í 10. bekk í Hrafnagilsskóla
Gámasvæðið – opnunartími um jól og áramót
Opnunartíminn er kl. 13:00-17:00 þriðjudaga, föstudaga og laugardaga.
Lokað verður föstudaginn 26. desember.
Skrifstofa Eyjafjarðarsveitar
Opnunartími Íþróttamiðstöðvar Eyjafjarðarsveitar yfir hátíðarnar
23. desember - lokað
24. desember - lokað
25. desember - lokað
26. desember - lokað
27. desember kl. 10:00 – 17:00
28. desember kl. 10:00 – 17:00
29. desember kl. 06:30 – 21:00
30. desember kl. 06:30 – 21:00
31. desember - lokað
1. janúar - lokað
2. janúar kl. 10:00 – 21:00
Starfsfólk Íþróttamiðstöðvar Eyjafjarðarsveitar óskar ykkur gleðilegra jóla
Bókasafn Eyjafjarðarsveitar Hrafnagilsskóla
Síðasta opnun fyrir jól er föstudaginn 19. desember frá kl. 10:30 – 12:30.
Á milli jóla og nýjárs er opið mánudaginn 29. desember frá kl. 13:00-16:00.
Safnið opnar eftir áramót föstudaginn 2. janúar og er þá opið frá 10:30-12:30.
Grár fress með hvíta bringu í óskilum
Heimasætan á Laugalandi syðra, hún Úlfhildur, bauð kunningja sínum honum Grána í mat um daginn. Það er ekki í frásögur færandi en síðan þá hefur Gráni verið eins og grár köttur alla daga síðan og emjar oft ákaflega um nætur ef hann fær ekki að koma inn. En Gráni er einmitt grár högni með hvíta bringu og einhverjar þær stærstu vígtennur sem ég hefi séð í einum fress. Hann á greinilega heimilisfestu annars staðar því hann er ósköp vinalegur um flest. Skyldi nú einhver sakna hans þá er hann hér á sveimi nánast allan sólarhringinn.
Með bestu aðventukveðjum í sveitina.
Hannes
